تكات واسرار نجاح البسكويت
كل عام وحضراتكم طيبين
انا حبيت انى افرد مواضيع منفصلة لاسرار نجاح وفشل حلويات العيد هنبتدى بالبسكويت وبعدين هاعمل الكحك والبيتى فور والغريبة
لان التكات دى اهم من المقادير نفسها اللى مش هنختلف عليها اكيد ثابتة عند الكل ومفيهاش اى اختراعات
تكات مطبخ ام عمرو خالد لنجاح البسكويت
1-لازم يكون السكر ناعم جدا مفيهوش اى حبيبات او كلاكيع علشان كدا بننخله الاول قبل مانشتغل .
2-خلينا نتفق ان البيتى فور والبسكويت والسابلية بنشتغل بزبدة مش سمنه لان السمنة مش هتخليه خفيف وهش الزبده نتيجتها احلىلان الزبده فيها كميه من الميه بتتبخر وهو فى الفرن بتديله طراوه ولوهنستخدم سمنة هنغيرالمقاديرشوية
3-السمنه و الزبدة تكون فى التلاجه متكونش سايحة ونضربها كويس مع السكر لما يدوب خالص لانه لو ما دابش كويس ها يخلى البسكويت يفرش وكمان يلزق فى الصاج وكمان تشتغلى فى جو مش حر علشان الزبدة متسيحش منك وتفصل يفضل تشتغلى قدام مروحة او تكييف .
4- النشادر ندوبها مع اللبن يكون دافى زى دمعة العين لاهو ساخن ولاساقع يعنى نعاملها معاملة الخميرة البيرة تمام
لانه لو سخن هيقلل مفعول النشادر جوه الفرن وهتفسد اصلا ولو ساقع هيخلى الخليط يفصل ما يبقاش متجانس ولو مش عندك نشادر استبدليها ببيكنج بودر .
لوعاوزة طريقة بسكويت النشادر دوسى على الصورة دى
5-ما نعجنش خالص يدوب نجمع العجينه عشان لو اتعجنت ممكن السمنه تفصل بعد كده عن العجينه ونزود دقيق حسب ما تحتاج العجينه فى ايدينا
6- ما تزوديش دقيق كتير قوى لحد ما العجينه تلم زى ماقلت لك هتحسيها فى الاول انها طريه شوية متخافيش سيبيها ترتاح شويه وتشرب السوائل والسمنة تجمد وهتلاقيها بقت متماسكه اكتر من الاول لاننا لو زودناها دقيق كتير من الاول وسيبناها ترتاح ممكن نلاقيها جبست وبقت ناشفه
ومش ها تمشى كويس فى الكيس وتطلع عين اهلك لمؤاخذة وتقعدى تدعى على ههههههههه
والبسكويت هيبقى محجر لمايستوى كمان
7- لما تيجى تشتغلى اول مرة بالكيس لقيتي العجينة سايلة لان الجو حر حطيها شوية فى التلاجة تمسك نفسها مش اكتر من خمس دقايق واشتغلى تانى
ودى طريقة بسكويت العيد بكيس الحلوانى
8-بعد التقطيع نخلى بالنا نسيب فراغات بين البسكويت عشان هيزيد
9- وانتى بتقطعيه هتبلى ايدك خفيف قوى بالزيت وتقطعى بمقص وترصى على صاج مدهون زيت برضه
10-متسويش البسكويت مرة واحدة لا استنى سوى صاج واحد تجربة فيه بسكويتين او تلاته بس نجربهم فى الفرن
لو ظبط معاكى يبقى تمام اما لو لقيتيه فرش يبقى محتاج دقيق تانى فهناخد العجينه ونزود لها دقيق ونلفها وهكذا
11- ونخبز على فرن متوسط مايل للهادى شويه (160 -170)علشان ياخد راحته فى السوا كويس ويبقى لونه دهبى مش ابيض
لو ابيض هيطرى بعد كده منك لكن الذهبى ده هيفضل مقرمش لاخر واحدة
12- لما تطلعيه من الفرن متلمسيهوش قبل ما يهدي شويه لانه بيبقي ناعم و ممكن يتكسر بسهولة
13-وعلشان يفضل مقرمش على طول حطيه بعدمايبرد فى علبة بلاستيك محكمة الغلق زى علب التلاجة لو معندكيش يبقى حله كبيره مفروشه بالبلاستيك وغطيها او كرتونة
14-البسكوت فرش جامد او النقشة راحت منه ده بيبقى يا اما زودتى السكر عن المقدار المحدد وهو كيلو سكر لكل 3 كيلو دقيق
او زودتى النشادر عن المقدار المحدد وهو اوقية لكل 3 كيلو دقيق والكيلو دقيق له معلقة كبيرة ممسوحة يعنى 10 جرام بس
او زودتى البيكنج بودر او ضربتى الزبدة كتير ودخلها هوااو تركتيه فترة قبل التسوية فخمر زيادة والحل انك تزودى دقيق وتلفيه تانى وتشكليه
15-البسكوت ناشف وده بسبب ان مقدار السمن اقل من المطلوب وهو نص كيلو سمن لكل كيلو دقيق
وكمان السوايل الكتير بتنشفه ممكن تستبدلى اللبن الحليب بالحليب المجفف افضل
16-كل ماتكترى المادة الدهنية يكون البسكويت ناعم ومش كريسبى ويتكسر
17- -لوعاوزاه بالبرتقال هتستبدلى اللبن بعصيربرتقال وبشربرتقال لومفيش برتقال برضه قدامك عصيرتانج وتدوبيه فى مية اولبن او تضيفى روح برتقال
لوعاوزة طريقة بسكويت البرتقال دوسى على الصورة دى
ولوعاوزاه اقتصادى جدا يبقى هنستخدم مية زى المحلات ودى طريقته دوسى عالصورة
.18- لوبتحبى جوزالهند اطحنى شوية ناعم اوى وضيفيهم للدقيق او ضيفى روح جوزهندسايلة .
ودى طريقته برضه
19- البيض ممكن تقلليه لو مبتحبيهوش بس مش اقل من 4 طبعا .
20-ممكن تعززى نكهة اللبن اكتر بانك تضيفى للدقيق حليب نيدو بودرة .
يارب الوصفة تعجبكم و كل سنة وانتوا طيبين وياريت تساعدونا نوصل لاكبرعدد ممكن وشير للوصفة فى اى مكان وربنايجعله فى ميزان حسناتكم