بسكويت العيد بكيس الحلوانى

طريقة عمل بسكويت العيد بدون مكنة

كل سنة وانتم طيبين العيد على الابواب

النهاردة هنعمل بسكويت النشادر بكيس الحلوانى للناس اللى معندهاش مكنة البسكويت

كيلو الاربع دقيق

4 او 5 بيضات

ربع كيلو سكر بودره

معلقة صغيرة فانيليا

معلقة كبيرة نشادر

حوالى كوباية لبن دافئ

معلقة صغيرة بيكنج بودر

400جرام زبدة +3معالق زيت

الطريقة سهلة خالص وان شاء الله هيطلع احلى من بتاع المحلات

لو اتبعتى التعليمات والتزمتى بالتكات اللى هاقولها دى

نضرب الزبدة شوية كدا (وممكن تستعملى زبدة على سمنة عادى)

بعدين نضيف السكرالبودرة وياريت تنخليه لو شارياه من بره علشان ميكونش فيه كلاكيع لحد ما يبقى زى الكريمة

وبعدين نضيف الزيت هتلاقى لونها فتح معاكى كدا

نضيف البيض واحدة واحدة والفانيليا خلى بالك ميكونش طالع من التلاجة اوك يكون بدرجة حرارة الغرفة كانك بتعملى كيك بالظيط

نجيب اللبن الدافى لاسخن ولا بارد زى دمعة العين وندوب فيه النشادر كويس اووووى ونتاكد انها دابت كلها وننزل بيها سرسوب خفيف كدا بالراحة خالص على الخليط

تكونى ناخلة الدقيق والبودر وتضيفى رشه الملح وتضيفيهم الدقيق شويه شويه لو بتعجني بايدك

او بالعجان لحد مالعجينة تلم معاكى مش بتلزق فى الايد بس طرية شوية علشان احناهنشتغل بالقمع

تسيبي العجين يرتاح عشر دقايق في التلاجه من حراره العجن والجو النار دا و تدهني الصاج بالزيت

ونبدأ نشكله ممكن تستخدموا مكنة بيتى فور او كيس الحلوانى اللى يريحك

و تشكلي بالقمع شكل النجمه او المشط بيبقي شكلهم حلواوى ويفضل يكون الكيس بلاستيك طبعا مش قماش اناجبت القماش وحش جدا جدا بيطرد السمنة ويمتصها

لو لقيتى العجينة سايحة منك زودى لها معلقتين دقيق مش مشكلة لان نوع الدقيق بيفرق وفى دقيق اصلا بيطرد السمنة

ولو عاوزة تعمليه زى البيتى فور اوك مفيش مشكلة مش لازم الشكل التقليدى يعنى

لو عاوزة تعملى جزء منه بالشيكولاتة شيلى ربع كوباية دقيق
وحطى مكانهم كاكاو خام عارفة يعنى ايه خام يعنى بدون سكر مش اللى فى العلب دا علشان السكرميبقاش كتيرويفرش منك

و تكوني مسخنه الفرن بتاعك علي 180 قبلها وبعدين هديه ل 160 عشان يطلع مظبوط لو معندكيش تدريج في الفرن يبقي درجه تسويه الكيك العادي و مبياخدش وقت خالص في الفرن ممكن 10 او 15دقيقة المهم ابقى تابعيه ولمايصفر كدا ويبقى لونه دهبى جميل طلعيه يبرد

اناباسوى فى فرن الغاز اوالبوتاجاز صراحة
والنتيجة زى ماانتم شايفين كدا شكله اجمل من اللى بالمكنة

اللى عاوزة بسكويت العيدبالمكنة تدوس على الصورة دى هتحولك للموضوع