طريقة عمل بسكويت البرتقال زى المخابز

بسكويت البرتقال الهش 

كيلو دقيق
400 جرام زبده 
400 جرام سكربودرة 
5 بيضات كبار او 6 
باكو بيكنج بودر
فانيليا 
ذرة ملح 
روح برتقال او رشة جوز هند 
ملعقة شاى خل

زيت لدهن الصاج

الوصفة دى فعلا يابنات زى بسكويت اللى بنشتريه تمام هش ومقرمش وطعمه جميل جدا 

وهوبيفرق عن اللى بنعمله بالبيت ان مفيش فيه اى سائل لا لبن ولا عصير ولا اى حاجة بيكون اشبه بالبيتى فور والسابليه كدا

واللى قلقان منه يجرب نص الكمية فقط 

الطريقة سهلة خالص وان شاء الله هيطلع احلى من بتاع المحلات 

لو اتبعتى التعليمات والتزمتى بالتكات اللى هاقولها دى 

نضرب الزبدة شوية كدا (وممكن تستعملى زبدة على سمنة عادى)

بعدين نضيف السكرالبودرة وياريت تنخليه لو شارياه من بره علشان ميكونش فيه كلاكيع  لحد ما يبقى زى الكريمة

نضيف البيض واحدة واحدة والفانيليا خلى بالك ميكونش طالع من التلاجة اوك يكون بدرجة حرارة الغرفة كانك بتعملى كيك بالظبط

تكونى ناخلة الدقيق والبودر وتضيفى رشه الملح وتضيفيهم الدقيق شويه شويه لو بتعجني بايدك 

او بالعجان لحد مالعجينة تلم معاكى مش بتلزق فى الايد بس طرية شوية علشان احناهنشتغل بالقمع مش لازم ناخد كل الكمية يعنى حسب ماتلاقى العجينة مناسبة 

تسيبي العجين يرتاح عشر دقايق في التلاجه من حراره العجن والجو النار دا

 و تدهني الصاج بالزيت

ونبدأ نشكله ممكن تستخدموا مكنة بيتى فور او كيس الحلوانى او مكنة البسكويت اللى يريحك

و تشكلي بالقمع شكل النجمه او المشط بيبقي شكلهم حلواوى ويفضل يكون الكيس بلاستيك طبعا مش قماش اناجبت القماش وحش جدا جدا بيطرد السمنة ويمتصها 

لو لقيتى العجينة سايحة منك زودى لها معلقتين دقيق مش مشكلة لان نوع الدقيق بيفرق وفى دقيق اصلا بيطرد السمنة

ولو عاوزة تعمليه زى البيتى فور اوك مفيش مشكلة مش لازم الشكل التقليدى يعنى 

لو عاوزة تعملى جزء منه بالشيكولاتة شيلى ربع كوباية دقيق

وحطى مكانهم كاكاو خام عارفة يعنى ايه خام يعنى بدون سكر مش اللى فى العلب دا علشان السكرميبقاش كتيرويفرش منك

و تكوني مسخنه الفرن بتاعك علي 180 قبلها وبعدين هديه ل 160 عشان يطلع مظبوط لو معندكيش تدريج في الفرن يبقي درجه تسويه الكيك العادي و مبياخدش وقت خالص في الفرن المهم ابقى تابعيه ولمايصفر كدا ويبقى لونه دهبى جميل طلعيه يبرد

اناباسوى فى فرن الغاز اوالبوتاجاز صراحة

تكات مطبخ ام عمرو خالد لنجاح البسكويت

اوقات بتعملى الوصفة صح والمقادير ومع ذلك مبتنجحش 

وبالذات البسكويت دا السهل الممتنع فقبل ماتنفذى الوصفة رجاء شوفى الموضوع دا 

دوسى على الصورة 

يارب الوصفة تعجبكم و كل سنة وانتوا طيبين وياريت تساعدونا نوصل لاكبرعدد ممكن وشير للوصفة فى اى مكان وربنايجعله فى ميزان حسناتكم