كيفية اختيار اوانى الطهى ( القدور ) الصحية

انواع حلل الطبخ ومميزات وعيوب كل منها

النهاردة حبيت اتكلم معاكم ونتناقش في موضوع مهم جدا اللي هو حلل الطبخ بتاعتنا وايه احسن واصح نوع المفروض نستخدمه حفاظا على صحتنا وصحة اولادنا وازاى نختار حاجة تكون صحية وبنفس الوقت تعمر وتعيش معانا

اولا الاوانى الالومنيوم مميزاتها وعيوبها

من أقدم أواني الطهي وأكثرها انتشاراً الالومنيوم 

 مميزاتها 

جيدة التوصيل للحرارة

 وسعرها رخيص   

متوفرة باحجام مختلفة وكبيرة

الطقم ممكن يوصل 13حلة 

سهلة التنظيف

اما عيوبها 

تتفاعل مع الاكل والملح  والمكونات الحمضية والطماطم والليمون

و طبعا دا صعب

و مع مرور الوقت وطول الاستعمال بتنقر يعنى طبقة الالومنيوم الخارجية بتتآكل ويبقي فيها حتت سودا كدا 

ودا لان المعدن مع الحرارة بيتمدد والاكل بيدخل جواه ولمانطفى عليه ويبرد المعدن بينكمش تانى فبيقفل على الاكل جوه ومع التسخين تانى بيتمدد ويطلع الاكل دا مع الالومنيوم كمان ويتحد بالاكل بتاعنا وهكذا لحدماتلاقى الفجوات السودا دى فيه واللى مهما غسلتيها مش هتعرفي تنضفيها من جوه وتتراكم فيها الميكروبات والبكتيريا يبقى احنا كدا الالومنيوم خارج اختياراتنا فمش هافاضل بين الشركات المنتجة ليه خالص 

تاني نوع الحلل الصاج 

ودي حلوة وجميلة وشكلها لطيف اووى 

بس عيبها انها مينفعش تعملى فيها اكل غير سوايل يعنى شوربات وطبيخ انما رز ومحشى لا مع ان فى انواع غالية ينفع زى الاطقم التشيكى تقيلة وممتازة 

بس الاغلب لا دا غير انها بتصفر ومع الوقت ممكن تسود كمان بس حلها بسيط اغلى فيها خل او اسلقى بطاطس هترجع بيضا زى الفل وفى وصفة تغلى فيها كلور ودى مبافضلهاش لان غلط الكلور يلامس اى اوانى طهى 

ومع الوقت كمان هتلاقى انهابتقشر فياريت يقتصر استخدامك ليها علي حفظ الاكل فيها كعلب تلاجة يعنى اطبخى اكلك ولواتبقى حاجة حطيهافيها فى التلاجة افضل 

تالت نوع معانا التيفال 

بقالنا سنين طبعا عارفين ميزته انه صحي الي حد ما من حيث انك بتقللي الدهون في الطبخ بيه وممكن تستغني عنها خالص والميزة التانية ان الاكل مبيلزقش فيه 

نيجي لعيوبه بقي انه مهما اشتريتي ماركة غالية واستخدمتي معالق خشب او سليكون وغسلتيه بليفة مش سلم مواعين 

الا انه برضه بيقشر ويتخدش وطالما الطبقة السمرا دي اتجرحت استعوضي ربنا بقي فيه 

ومحدش يقاوح بالله عليكم ويقول عندى زهران اغلى نوع انا جبت اكترمن نوع غالى ورخيص نفس القصة 

بس لوعندك حلو مش بطال واقولك كام نصيحة تحافظى بيها عليه اطول وقت اول استخدام يفضل تحطى معلقة زيت فيها وتمسحيى بيها الحلة طبعا تكون النار متوسطة او هادية مش عالية تستخدمى طقم توزيع خشب اوسليكون

حذار تحطيها تحت المية وهى سخنة سيبيها تبردخالص وبعدين اغسليها بليفة ناعمة 

حذار تستعملى مزيل دهون او كلور علشان ميتفاعلش مع طبقة التيفال ويقشرها جينا للجديد بقى السيراميك والجرانيت 

لما طلع السيراميك من كام سنة علي فتافيت عجبني جدا ورحت جبت ٣حلل 

واحدة صيني وللاسف طلعت صاج مطلي خفيفة تحر قالاكل ومع الاستعمال نقرت وصدت كمان 

مع ان شكلها تحفة عجبنى جدا 

مميزاته هي نفس مميزات التيفال تمام وتقيلة جدا والومنيوم نقى 

المفاجأة بقي مع ان الحلة محفور عليها سيراميك وصنع في تركيا الاانها طلعت تيفال ابيض مش سيراميك نصب علني يعني 

افضل انواع الاونى السيراميك والجرانيت

الخلاصة بقي السيراميك والجرانيت عندك 

نيوفلام neoflam و بى ان ولافا وازوردى تورنيدو كورى

بودريني الايطالي وفالز وسافلون وكوركماز التركي 

وارشيا الالمانى

وفى تيفال عملت نوع جرانيت هايل برضه 

اما الاشهر فهو نيوفلام

ودا مميزاته كتير جدا هو والجرانيت والتيفال تقريبا نفس القصة مفيش اختلاف 

بس عيبه بقى ان ايده مش عملية محتاجة جوانتى سليكون تمسكى بيه 

ودا بيتجاب بالحلة مش بالطقم انتى تختارى المقاسات اللى محتاجاه مش بكترالعدد يعنى ودايما تسيبى مقاس وتجيبى التانى علشان فرق الفلوس يكون يستحق بمعنى جبتى اول حلة 16 يبقى تجيبى 20 مش 18 لان حجمهم هيكون مقارب لبعض اصلا 

اما اناجبت طاسة كوري جميلة جدا اسمها rochen تحفة بجد والله حتى مرة الولاد حرقوا فيها اكل دعكتها بسلك ناعم ولا جرالها حاجة 

الجرانيت هتلاقى منه الوان كتير يااما سادة من بره ومن جوه جرانيت يااما من بره وجوه جرانيت زى كدا وخلوا بالكم ان فى شركات بتبيع التفلون على انه جرانيت اوسيراميك 

وعلشان يكون الاوانى بتاعتنا صحية تتاكدى انها خالية من الرصاص والكادميوم 

فى شركة سويسرية انتجت اوانى اسمها zepter بس غالية شويتين على ماسمعت اللهم احفظنا الحلة ب2000جنيه 

بتسوى الاكل بدون سوايل ولا دهون 

الاوانى الاستانلس مميزاتها وعيوبها 

الاستانلس مع اني كنت اسمع انه بيصفر ويشيط الاكل الا انه صحي جبت طقم مش ماركة ولاحاجة ومصري شغال معايا جميل جدا خلاني ركنت التيفال والسيراميك وباعمل فيه الرز بالواحدة والمحشى وكل حاجة واللبن كمان باغليه فيه بس باهدي النار شوية 

مميزاته بقى صحى لانه لايتفاعل مع الاكل 

سهل التنضيف ومعمر جدا بيعيش يعنى ولازم تاخدى بالك من حاجة فى استانلس مضروب اختارى اللى تلاقى محفور عالارضية بتاعته 18/1

دا افضلهم وعيبه الوحيد انه ردىء التوصيل للحرارة علشان كدا بيعملواله قاعدة سميكة الومنيوم تحت لتوزيع الحرارة

الانواع قدامك كتير جدا استانلس زهران المصانع الحربية ونوفال وتقريبا كل الشركات بتاعة الاوانى بتعمل استانلس 

ولو حصل واصفر منك استخدمى الوصفة دى دوسى عالصورة 

ولو نسيتى فيه حاجة واتحرقت عندى الحل برضه متقلقيش خالص

اخرحاجة الفخار والبورسلين والبيركس 

الاوانى الفخارية والطواجن افضل انواع القدور على الاطلاق وصحية لاقصى درجة وبتدى الاكل طعم تانى طبعا 

واخواتنا بالمغرب الغربى بيطبخوا فيها دايما تلاقى اكلهم له طعم تانى 

مميزاتها لاتتفاعل مع الاكل موصلة جيدة للحرارة تحتفظ بالحرارة وقت طويل بعد انتهاء الطهى منها انواع تستخدم فوق النار مباشرة وفى الفرن وفى انواع بالفرن بس

الطواجن البلدى دى احسن من المطلية اللى بتلمع 

ودى لازم تتودك او تتعتق قبل الاستخدام بمعنى انك يااما تدهنيها زيت من بره وجوه او سمنة او دهن او زيت وعسل اسود 

وبعدين تولعى الفرن وتحطيها فيه لحدماتستوى ودى تعرفيها لماتلمسى الطاجن وايدك تطلع نضيفة مفيش فيها اى لون 

ولوعندك فرن خبيز او مولعين فحم ممكن ترميه جواه شوية وتحته شوية 

وبعدكدا استخدميه زى الفل والله طعم الاكل فيه شكل تانى 

اما البيركس بقى فى منه بيركس حرارى ودى بتتحط عالنار بس طبعا هادية وتطبخى فيه 

وفى انواع للفرن بس واناعندى لومينارك فرنساوى تحفة بس طواجن مش حلل 

الخلاصة يابنات بعد اللت الكتير دا 

خلينا نكون متفقين ان المعمر والصحي السيراميك والجرانيت والاستانلس والفخار اوالبورسلين والبيركس 

اماكن شراء الاوانى فى مصر وجهاز العروسة 

عندك النوحيد والنور ومحلات الموسكى اللى هى جنب محلات شارع عبدالعزيز مش شارع عبدالعزيز اللى فى العتبة لا دى اسواق شارع عبدالعزيز فاتح فى كذا مكان عندى فى مدينة نصر

وطبعا عندك رنين ومحلات تيوليب حلوة جدا وطبعا عمر افندى واى منفذ بيع قدامك للادوات المنزلية ومنفذ بيع المصانع الحربية وطبعا كارفور وفتح الله واولاد رجب ومركاتو

الكلام دا بالنسبة للاستانلس

اماالسيراميك هنزود عليهم مكان تانى للى تحب تتعب شوية بس هتوفر كتير لو فى القاهرة اوالجيزة عندك درب سعادة - العتبة - قريب من حمام التلات اللى هو فيه جهاز العروسة من الابرة للصاروخ هتسالى على محلات اولاد نصار هو فى حارة كدا مش على الشارع بس مااقولكيش بقى على جودة الخامات وسعرها الحنين لانهم اول ناس دخلوا السيراميك مصر وشغلهم مع المورد على طول تمام كدا

بالنسبة للسيراميك الكورى الاسم يكون بارز مش محفور made in korea

انا عندى الاتنين وشفت بنفسى التقليد من الاصلى اكتشفته بالصدفة

وموجود منه نيوفلام و rochen ,ولافا اللى بيستخدمها شيفات سى بى سى دلوقتى واماكن بيعها من المورد زى ماكاتب على البيدج اهى

منتجات lava متوفره في كل من - هايبر وان _ المرشدي _ اولاد رجب _ ماركاتو _ رنين _ عرفه جروب _ بيم _اسواق بوري _ محسن الفيومي _ اسواق 6 اكتوبر _ اللكترك هاوس _ فاملي ستور _ اوسكار _الدار _ الغزاوي _ عالم ماركت _ عالم تك _ هايبر نجمة هليوبلس _ مول العابد _ هايبر بلس _ اسواق بدر _ بالاضافه الي وسط البلد وحمام التلات و الاسكندريه والشرقيه والمنصوره والمنوفيه والسويس وبورسعيد والقنطره وجميع محافاظات الصعيد والجمهوريه .

الاستانلس بقى يااما محلى يا مستورد

المستورد كوركماز ودا تركى بيشكروا فيه اوووى وارشيا الالمانى

والمحلى عندك زهران ودا برضه التوب ونوفال والمصانع الحربية و يونستيل هتلاقى انواع كتير تانى 

الكلام دا خلاصة تحربتي باقدمها لاي عروسة بتجهز اوست بتجدد مطبخها ويارب تعجبكم

وارجو الدعاء بالشفاء لابنى الصغير