بسكويت جوز هند سهل وبسيط
كل عام وحضراتكم بخير
سبق وعملنا كل اصناف حلويات العيد
النهاردة هنعمل بسكويت جوزالهند الخطييير ياريت تجربوه
المقادير
كيلو دقيق
400جرام زبدة
300جرام سكربودرة
5بيضات
جوزهند
معلقة كبيرة بيكنج بودر
نص كوباية لبن او مية
رشة ملح
طريقة تانية بدون لبن
كوبايتين ونص دقيق
كوباية زبدة الا معلقتين
معلقة صغيرة بيكنج بودر
بيضتين
معلقة صغيرة فانيليا
كوباية سكر بودرة
جوز هند
المقادير اهى يابنات باللبن زى البسكويت العادى بتاعنا وهيكون الدقيق اكتر طبعا و بدون اللى يريحك اعمليه
البسكويت داسهل جدا ممكن يتعمل بالويسك اليدوى مش لازم مضرب ولا عجان خالص لان عجينته هتكون اقرب للسابليه مش عاوزين ندخل له هوا كتير
السكر انا بحبه قليل لو بتحبيه كتير خلى كمية السكرقدالزبدة
طبعا هنكون نخلنا الدقيق وعليه البيكنج بودر ورشة الملح
وبعيدن نضرب الزبدة شوية كدا (وممكن تستعملى زبدة على سمنة عادى)
بعدين نضيف السكرالبودرة وياريت تنخليه لو شارياه من بره علشان ميكونش فيه كلاكيع لحد ما يبقى زى الكريمة
نضيف البيض واحدة واحدة والفانيليا خلى بالك يكون بدرجة حرارة الغرفة يعنى يكون بره التلاجة
وبعدين نضيف اللبن بدرجة حرارة الغرفة برضه خلى بالك
وبعدين الدقيق ونقلب يدوبك نلم العجينة باطراف الاصابع متعجنيش
حسب ماالعجينة تلم معاكم مش لازم تستخدمى كل الكمية ممكن اقل وممكن اكتر حسب نوعية الدقيق
جوزالهند كميته متروكة لتقديركم وحسب رغبتكم بس مش هيكون اقل من نص كوباية عادة ويفضل يكون ناعم على قدماتقدرى ولو عاوزة تزودى النكهة ضيفى روح جوزهند
اللبن لو عندك لبن جوزهند طبعا النتيجة هتكون اجمل انما احنا مش متوفرعندنا فبنزود كمية جوزالهندوخلاص بيدى نفس النتيجة
جوزالهند عندك اختيارين يااما تضيفيه للدقيق ويبقى داخل البسكويت او انك بعدماتخلصى تحطيه على وش البسكويت اختارى اللى يريحك
طبعا ممكن نستبدل جوزالهند باى نوع مكسرات تحبيه
اذا لقيتى العجينة لينة نوعا ما يااماتزودى دقيق لحدماتلم معاكى او تزودى نشا بيدى للبسكويت قرمشة لذيذة
وتسيبي العجين يرتاح عشر دقايق في التلاجه من حراره العجن والجو النار دا علشان الزبدة متسيحش منك والدقيق يطردها
والبسكويت دا يفضل يتعمل بالمكنة او بكيس الحلوانى
لومش عندك يبقى خلى العجينة متماسكة شوية وزودى الدقيق وبعدين تفرديه زى السابلية كدا وباى قطاعات عندك اوتعمليه دوايرزى الغريبة كدا وانا بافضل اعمله كدا علشان يكون مختلف عن بسكيوت النشادرطبعا
بعدماتشكلبه اغمسيه فى جوزالهند ودوسى عليه علشان يمسك فيه
اوتعملى زى مابنعامل المعجنات والمخبوزات
تضربى بيضة وذرة نسكافيه وتدهنى الوش بسيط وبعدين ترشى جوزالهند
وبعدين ترصيه فى صينيه مدهونه زبدة او زيت
و تكوني مسخنه الفرن بتاعك علي 180 قبلها وبعدين هديه ل 160 عشان يطلع مظبوط لو معندكيش تدريج في الفرن يبقي درجه تسويه الكيك العادي و مبياخدش وقت خالص في الفرن ممكن 10 او 15دقيقة المهم ابقى تابعيه
درجة التسوية بقى زى ماتحبى يدوب يشقر بس كدا وميلونش علشان جوزالهندميحمرش لو حطاه من فوق ولوجوه العجينة يبقى تسوية عادية
ونصيحة بلاش تمسكى الموبايل وتفتحى الفيس اصلا لان اكيد هتنسيه ويتحرق منك وتعيدى عند الوالد انا حذرتك اهو ههههه
دا بقى موضوع عن اهم اسباب نجاح وفشل البسكويت ياريت تدخلوا تاخدوا فكرة دوسى على الصورة
اللهم اجعل عملى هذا خالصا لوجهك الكريم